ന്യൂഡല്ഹി: അനിശ്ചിതത്വങ്ങള്ക്കൊടുവില് നിര്ണായ തീരുമാനം കോണ്ഗ്രസ് പാര്ട്ടി പ്രഖ്യാപിച്ചു. കോണ്ഗ്രസ് അധ്യക്ഷന് രാഹുല് ഗാന്ധി വയനാട്ടില് തന്നെ മത്സരിക്കും. എ.കെ ആന്റണിയാണ് രാഹുലിന്റെ സ്ഥാനാര്ഥിത്വം ഡല്ഹിയില് പ്രഖ്യാപിച്ചത്.
സംസ്ഥാന ഘടകം ഐക്യകണ്ഠേനെ ആവശ്യപ്പെട്ടതിനെ തുടര്ന്ന് ദേശീയ നേതൃത്വം വയനാട്ടിലെ സ്ഥാനാര്ഥിത്വം അംഗീകരിക്കുകയായിരുന്നുവെന്ന് എ.കെ. ആന്റണി പറഞ്ഞു. കര്ണാടകയും തമിഴ്നാടുമായും അതിര്ത്തി പങ്കിടുന്ന സംസ്ഥാനമെന്ന നിലയില് വയനാട് തെരഞ്ഞെടുക്കുകയായിരിന്നുവെന്ന് എ.കെ.ആന്റണി അറിയിച്ചു.
കഴിഞ്ഞ വെള്ളിയാഴ്ചയാണ് രാഹുല് വയനാട്ടില് മത്സരിക്കുമെന്ന വിവരം കേരളത്തിലെ കോണ്ഗ്രസ് നേതാക്കള് അറിയിച്ചത്. തുടര്ന്ന് ടി.സിദ്ദീഖ് സ്ഥാനാര്ഥിത്വത്തില് നിന്ന് പിന്വാങ്ങിയിരുന്നു. അഭ്യൂഹങ്ങള്ക്കൊടുവിലാണ് കേരളത്തിലെ കോണ്ഗ്രസ് പ്രവര്ത്തകരെ ആവേശത്തിലാഴ്ത്തിക്കൊണ്ട് വയനാട്ടിലെ രാഹുലിന്റെ സ്ഥാനാര്ഥിത്വത്തില് ഔദ്യോഗിക പ്രഖ്യാപനം വന്നത്.
അമേത്തിക്ക് പുറമെ ദക്ഷിണേന്ത്യയില് നിന്ന് ഒരുസീറ്റില് മാത്രമാണ് മത്സരിക്കുന്നത്. അത് വയനാട് സീറ്റാണെന്ന് എ.കെ ആന്റണി പ്രഖ്യാപനത്തില് പറയുന്നു. വയനാട്ടില് നേരത്തെ സ്ഥാനാര്ഥിയായി നിശ്ചയിച്ചിരുന്ന ടി.സിദ്ദീഖിനെ മാറ്റിയാണ് രാഹുല് എത്തുന്നത്. ഏപ്രില് 4 വരെയാണ് നാമനിര്ദ്ദേശ പത്രിക സമര്പ്പിക്കാന് സമയമുള്ളത്. ഏപ്രില് 23 നാണ് കേരളത്തില് തിരഞ്ഞെടുപ്പ്.
എ എം