രാജ്യത്തെ മറ്റ് പല മേഖലകളും കോവിഡിന്റെ ആഘാതത്തില് ഉലഞ്ഞെങ്കിലും പാര്പ്പിട മേഖല നേട്ടത്തില് തന്നെയെന്ന് റിപ്പോര്ട്ട്. CSO-യുടെ ഏറ്റവും പുതിയ കണക്കനുസരിച്ച് ഭവനവിലയില് ഒക്ടോബര് മാസം 0.5% വര്ദ്ധനയാണ് ഉണ്ടായിട്ടുള്ളത്. ഇതോടെ തുടര്ച്ചയായി അഞ്ചാം മാസവും വില ഉയര്ന്നു.
അതേസമയം കഴിഞ്ഞ വര്ഷത്തെ അപേക്ഷിച്ച് ഭവനവില 0.4% കുറഞ്ഞിട്ടുണ്ട് എന്നാണ് CSO പറയുന്നത്. ഏതാനും മാസങ്ങള്ക്ക് മുമ്പുള്ള വിപണി വിവരങ്ങളാണ് ഈ റിപ്പോര്ട്ടിന് ആധാരം. എന്നാല് ഈ മാസത്തെ കണക്ക് നോക്കിയാല് ഭവനവില വീണ്ടും വര്ദ്ധിച്ചിരിക്കാമെന്നാണ് വിദഗ്ദ്ധാഭിപ്രായം.
കോവിഡ് കാലത്തും വീടുകള്ക്ക് ആവശ്യക്കാരേറിയതാണ് മേഖല ചാഞ്ചാട്ടമില്ലാതെ തുടരാന് കാരണമെന്നും വിദഗ്ദ്ധര് അഭിപ്രായപ്പെടുന്നു. കോവിഡിനെത്തുടര്ന്ന് Help-to-buy പദ്ധതിയില് പുതിയ ഇളവുകള് നല്കിയത് കൂടുതല് പേരെ വീട് വാങ്ങാന് പ്രേരിപ്പിച്ചു. 2020-ല് ആളുകളുടെ പാര്പ്പിടസമ്പാദ്യം വര്ദ്ധിച്ചതും നേട്ടമായി. മുന്വര്ഷത്തെ അപേക്ഷിച്ച് mortgage approval നിരക്ക് 24% ആണ് വര്ദ്ധിച്ചത്. ഇതില് മിക്കവരും ആദ്യമായി വീട് വാങ്ങുന്നവരുമാണ്.
എന്നിരുന്നാലും കഴിഞ്ഞ വര്ഷത്തെ അപേക്ഷിച്ച് വീടുകളുടെ ലഭ്യത കുറഞ്ഞതായാണ് കണക്കുകള് വ്യക്തമാക്കുന്നത്. ഇത് വിലവര്ദ്ധനയ്ക്ക് കാരണമായി. വീടുകളുടെ നിര്മ്മാണത്തിലും കാര്യമായ കുറവ് വന്നിട്ടുണ്ട്. വീടുകളുടെ നിര്മ്മാണം പൂര്ത്തീകരിക്കുന്നത് മുന്വര്ഷത്തെക്കാള് 9% കുറഞ്ഞതായാണ് CSO റിപ്പോര്ട്ട് വ്യക്തമാക്കുന്നത്. കോവിഡ് ബാധ കാരണം രണ്ട് മാസത്തോളം നിര്മ്മാണമേഖല സ്തംഭിച്ചത് തിരിച്ചടിയായി. ഈ വര്ഷം 19,000 വീടുകളുടെ നിര്മ്മാണം പൂര്ത്തിയാകുമെന്നാണ് കരുതപ്പെടുന്നത്. 2019-ല് ഇത് 21,000 ആയിരുന്നു. അതേസമയം നിലവിലെ പാര്പ്പിട പ്രതിസന്ധി പരിഹരിക്കപ്പെടണമെങ്കില് വര്ഷം 30,000 വീടുകളെങ്കിലും നിര്മ്മിക്കപ്പെടണമെന്നാണ് കണക്ക്.
രാജ്യത്ത് നിര്മ്മാണാനുമതി ലഭിക്കുന്ന കാര്യത്തിലും ഏറെ വളര്ച്ചയുണ്ടായിട്ടുണ്ട്. 2019-നെ അപേക്ഷിച്ച് 25% അനുമതി അധികം ലഭിച്ചു. ഇതില് ഭൂരിഭാഗവും അപ്പാര്ട്ട്മെന്റുകളാണ്.
അതേസമയം സര്ക്കാര് പുതുതായി പ്രഖ്യാപിച്ച Home Equity Sharing അടക്കമുള്ള പദ്ധതികള് മേഖലയെ ഇനിയും വളര്ച്ചയിലേയ്ക്ക് നയിക്കുമെന്നാണ് കരുതപ്പെടുന്നത്. പക്ഷേ അടുത്ത കാലത്തൊന്നും ഭവനവില കുറയാന് സാധ്യതയില്ലെന്നും വിദഗദ്ധര് അഭിപ്രായപ്പെടുന്നു.