ഡബ്ലിനില്‍ ഇന്നലെ രണ്ടിടങ്ങളിലായി നടന്ന വെടിവയ്പ്പില്‍ ഒരു മരണം. Clondalkin, Finglas ഏരിയകളിലായിരുന്നു വെടിവയ്പ്പുകള്‍ നടന്നത്. Clondalkin ല്‍ നടന്ന വെടിവയ്പ്പിലാണ് ഒരാള്‍ മരണപ്പെട്ടത്. Finglas ല്‍ നടന്ന അക്രമത്തില്‍ പരിക്കേറ്റയാളെ നിലവില്‍ ആശുപത്രിയില്‍ പ്രവേശിപ്പിച്ചിരിക്കുകയാണ്. ഈ രണ്ടു സംഭവങ്ങളും തമ്മില്‍ പരസ്പരം ബന്ധമില്ല എന്നാണ് ഗാര്‍ഡയുടെ പ്രാഥമിക വിലയിരുത്തല്‍.
രാത്രി 9 മണിയോടെയായിരുന്നു Finglas വെടിവയ്പ്പ് നടന്നത്. Cardiffsbridge റോഡിലെ ഒരു കടയ്ക്ക് പുറത്തുവച്ചായിരുന്നു അക്രമം. Mr Flashy എന്നറിയപ്പെടുന്ന ഒരു ഗുണ്ടാനേതാവിന്റെ അടുത്ത അനുയായിയാണ് വെടിയേറ്റയാള്‍. ഒരു തവണ വെടിയേറ്റ ഇയാളുടെ പരിക്ക് ഗുരുതരമല്ല എന്നാണ് ലഭിക്കുന്ന വിവരം. ഈ സംഭവത്തിന് തൊട്ടുപിന്നാലെ Berryfield ഏരിയയില്‍ ഒരു കാര്‍ കത്തിച്ച നിലയിലും കണ്ടെത്തിയിരുന്നു.
രാത്രി 10 മണിയോടെയായിരുന്നു Clondalkin ഏരിയയില്‍ ഒരാളുടെ മരണത്തിന് കാരണമായ വെടിവയ്പുണ്ടായത്. വെടിയേറ്റയാള്‍ സംഭവസ്ഥലത്തുവച്ചുതന്നെ മരണപ്പെടുകയായിരുന്നു. സംഭവസ്ഥലത്ത് കുടുതല്‍ പരിശോധനകള്‍ നടത്തുമെന്നും ഗാര്‍ഡ അറിയിച്ചു.
