അയര്‍ലണ്ടില്‍ ഈ വാരാന്ത്യം അതിശൈത്യം തുടരുമെന്ന് കാലാവസ്ഥാ നിരീക്ഷണവകുപ്പ്. നാളെ രാത്രിയോടെ അന്തരീക്ഷ താപനില മൈനസ് 3 ഡിഗ്രിയിലേയ്ക്ക് താഴുമെന്നും അധികൃതര്‍ മുന്നറിയിപ്പ് നല്‍കുന്നു. ഈയാഴ്ചയിലെ ഏറ്റവും കുറഞ്ഞ താപനില ഇതായിരിക്കും.
ഞായറാഴ്ച പൊതുവെ തെളിഞ്ഞ കാലാവസ്ഥയായിരിക്കും. ചിലയിടങ്ങളില്‍ ഒറ്റപ്പെട്ട മഴയും പെയ്‌തേക്കാം. 4 മുതല്‍ 7 ഡിഗ്രി സെല്‍ഷ്യസ് വരെയാകും പരമാവധി താപനില. മിതമായ രീതിയിലുള്ള വടക്കന്‍ കാറ്റും വീശും.
രാത്രിയോടെ താപനില പൂജ്യം ഡിഗ്രിക്ക് താഴെയെത്തും. ഞായറാഴ്ച രാത്രിയിലും മൈനസ് 3 ഡിഗ്രി വരെ താപനില കുറഞ്ഞേക്കും. രാത്രിയില്‍ ഒറ്റപ്പെട്ട മഴയ്ക്കും സാധ്യതയുണ്ട്.
