സന: യെമനില് ഭീകരര് തട്ടിക്കൊണ്ടുപോയ മലയാളി വൈദികന് ഫാ.ടോം ഉഴുന്നാലിനെ മോചിപ്പിച്ചു. മസ്കറ്റിലെത്തിയ ഫാദര് ടോമിനെ ഇന്ന് കേരളത്തിലേക്ക് കൊണ്ടുവരും. അദ്ദേഹത്തെ രക്ഷപ്പെടുത്തുന്നതിനുള്ള ശ്രമങ്ങള് നടന്നുവരികയായിരുന്നു.
ഒമാന് ഭരണാധികാരി സുല്ത്താന് ഖാബൂസ് ബിന് സഈദിന്റെ നിര്ദേശത്തെ തുടര്ന്ന് ഒമാന് വിദേശകാര്യ മന്ത്രാലയം വിഷയത്തില് ഇടപെട്ടാണ് മോചനം സാധ്യമാക്കിയത്. യെമന് മന്ത്രിയുമായുള്ള കൂടിക്കാഴ്ചയില് ഈ വിഷയത്തിലുള്ള ആശങ്ക സുഷമ സ്വരാജ് അറിയിച്ചപ്പോള് ഇതുവരെ ലഭ്യമായ വിവരത്തിന്റെ അടിസ്ഥാനത്തില് ഫാദര് ജീവനോടെയുണ്ടെന്ന് യമന് സര്ക്കാര് അറിയിച്ചിരുന്നു. ഈ വര്ഷം മേയില് തന്നെ മോചിപ്പിക്കണമെന്ന് ഫാ. ടോം ഉഴുന്നാലില് അഭ്യര്ഥിക്കുന്ന വിഡിയോ പുറത്തുവന്നിരുന്നു. ക്ഷീണിതനും ദുഃഖിതനുമായി കാണപ്പെടുന്ന ഫാ. ഉഴുന്നാലില്, തന്റെ ആരോഗ്യനില വഷളാണെന്നും അടിയന്തര ചികില്സ ആവശ്യമുണ്ടെന്നും വ്യക്തമാക്കുന്നതായിരുന്നു ദൃശ്യങ്ങള്.
2016 മാര്ച്ച് നാലിനാണ് യെമനിലെ ഏദനിലുള്ള മിഷനറീസ് ഓഫ് ചാരിറ്റീസിന്റെ വൃദ്ധസദനം അക്രമിച്ച ശേഷം നാലു കന്യാസ്ത്രീകളെയും നിരവധി അന്തേവാസികളെയും വധിക്കുകയും ഫാ. ടോമിനെ തട്ടിക്കൊണ്ടുപോവുകയും ചെയ്തത്. പിന്നീട് ഫാ.ടോമിനെ വിട്ടുതരണമെങ്കില് വന് തുക മോചനദ്രവ്യം നല്കണമെന്ന് ഭീകരര് ആവശ്യപ്പെടുകയും ചെയ്തിരുന്നു. സലേഷ്യന് വൈദികനും പാലാ രാമപുരം സ്വദേശിയുമായ ഫാം. ടോം യെമനിലാണ് പ്രവര്ത്തിച്ചിരുന്നത്.
ഡി കെ