കോവിഡ് കാരണം അയര്‍ലണ്ടില്‍ ഡ്രൈവിംഗ് ലൈസന്‍സ് പുതുക്കാന്‍ സാധിക്കാത്തവര്‍ക്ക് ലൈസന്‍സ് കാലാവധി നീട്ടി നല്‍കുന്നതായി Road Safety Authority (RSA). ഇത് രണ്ടാം തവണയാണ് രാജ്യത്ത് ഇത്തരത്തില്‍ ലൈസന്‍സ് കാലാവധി നീട്ടുന്നത്. 2020-ലും ഡ്രൈവര്‍മാര്‍ക്ക് സമാനമായ സൗകര്യം RSA നല്‍കിയിരുന്നു.
2020 ജൂണ്‍ 1-നും 2020 ഓഗസ്റ്റ് 31-നും ഇടയില്‍ ലൈസന്‍സ് കാലാവധി തീര്‍ന്നവര്‍ക്ക് (മിക്കവാറും പേര്‍ക്കും), തീര്‍ന്ന തീയതി മുതല്‍ 13 മാസത്തേയ്ക്ക് കാലാവധി നീട്ടിനല്‍കും.
2020 സെപ്റ്റംബര്‍ 1-നും 2021 ജൂണ്‍ 31-നും ഇടയിലാണ് കാലാവധി തീരുന്നതെങ്കില്‍ 10 മാസത്തേയ്ക്കാണ് അധിക കാലാവധി നല്‍കുക.
2020 മാര്‍ച്ച് 1-നും 2020 മെയ് 31-നും ഇടയില്‍ ലൈസന്‍സ് കാലാവധി അവസാനിച്ചവര്‍ക്ക് 2021 ജൂലൈ 1 വരെ അതേ ലൈസന്‍സ് ഉപയോഗിച്ച് വാഹനമോടിക്കാമെന്നും അധികൃതര്‍ അറിയിച്ചു.
ആദ്യ ഘട്ടത്തില്‍ കാലാവധി നീട്ടിക്കിട്ടിയവര്‍ക്കും ഈ സൗകര്യം ലഭ്യമാണ്. തങ്ങളുടെ ലൈസന്‍സ് കാലാവധി എപ്പോള്‍ വരെയാണെന്ന് ഡ്രൈവര്‍മാര്‍ക്ക് National License Service വെബ്‌സൈറ്റില്‍ കൂടി അറിയാന്‍ സാധിക്കും. ലൈസന്‍സ് പുതുക്കാന്‍ സാധിക്കാത്തവരില്‍ നിന്നും പിഴ ഈടാക്കില്ലെന്ന് ഇന്‍ഷുറന്‍സ് കമ്പനികളും അറിയിച്ചിട്ടുണ്ട്.
