അയർലണ്ടിലെ മലയാളി സമൂഹത്തിന് വീണ്ടും ഐറിഷ് സർക്കാരിന്റെ ആദരം. സാംസ്കാരിക സാമൂഹിക, രാഷ്ട്രീയ രംഗങ്ങളിൽ സജീവമായ ഇടപെടലുകൾ നടത്തുന്ന ശ്രീ. സുനിൽ ശിവനെ പീസ് കമ്മീഷണറായി ജസ്റ്റിസ് മിനിസ്റ്റർ സൈമൺ ഹാരിസ് നിയമിച്ചു. 17 വർഷമായി ഡബ്ലിൻ അടുത്തുള്ള താലയിൽ സ്ഥിരതാമസക്കാരൻ ആയ ശ്രീ. സുനിൽ ശിവൻ, ഏഴ് വർഷത്തോളമായി ഫിന ഗെയിൽ പാർട്ടിയിലെ സജീവ പ്രവർത്തകൻ കൂടിയാണ്.
അങ്കമാലി ആലങ്ങാപറമ്പിൽ കുടുംബാംഗമായ ശിവന്റെ മകനായ സുനിൽ ഐറിഷ് മലയാളി സമൂഹത്തിൽ സുപരിചിതനാണ്. ഭാര്യ :ജ്യോതി രശ്മി Our Ladies Hospice, Dublin ൽ നഴ്സ് ആണ്. മക്കൾ: മേധാ സുനിൽ(Junior Cert), ശ്രേയ സുനിൽ(6th Class). അയർലണ്ടിൽ ആകെ 12 ൽ താഴെയുള്ള മലയാളി പീസ് കമ്മീഷണർമാരിൽ ഒരാളാണ്‌ ശ്രീ. സുനിൽ.
അദ്ദേഹത്തിന്റെ അധികാരപരിധി കൗണ്ടി ഡബ്ലിനും ഡബ്ലിനോട് ചേർന്നുള്ള കൗണ്ടികളുമാണ്. സർട്ടിഫിക്കറ്റുകൾ സാക്ഷ്യപ്പെടുത്തുക ഓർഡറുകൾ ഒപ്പിടുക എന്നിവയാണ് പീസ് കമ്മീഷണറുടെ പ്രധാന ചുമതലകൾ. ആവശ്യം എങ്കിൽ സമൻസോ, വാറന്റോ നൽകാനുള്ള അധികാരവും പീസ് കമ്മീഷണർമാർക്ക് ഉണ്ട്. കടകളിൽ വിൽപ്പനയ്ക്കു വരുന്ന ഭക്ഷ്യവസ്തുക്കളിൽ മായം കലർന്നിട്ടുണ്ടെന്നോ, ആരോഗ്യത്തിന് ഹാനികരം ആയ വസ്തുക്കൾ അടങ്ങിയിട്ടുണ്ടെന്നോ പരാതി ലഭിച്ചാൽ നടപടിയെടുക്കാനും പീസ് കമ്മീഷണർക്ക് അധികാരമുണ്ട്.
കുടിയേറ്റക്കാരോട് എന്നും സൗഹാർദ്ദ പൂർവ്വമായ നിലപാടുകളാണ് ഐറിഷ് ഗവൺമെന്റിന് ഉള്ളത്. കുടിയേറ്റക്കാരെ പീസ് കമ്മീഷണർമാരായി നിയമിക്കുന്നത് എല്ലാവരെയും ഉൾക്കൊണ്ട് പോകാനുള്ള സർക്കാരിന്റെ നല്ല ചിന്തകളുടെ പ്രതിഫലനമാണ്. ഇപ്പോൾ ഭരണത്തിൽ ഇരിക്കുന്ന ഫിനഗെൽ- ഫിനഫൽ കൂട്ടുകക്ഷി സർക്കാറിന് വളരെ ഉദാരപൂർവ്വമായാണ് കുടിയേറ്റ നയങ്ങളാണ് ഉള്ളത്. ഇത് മലയാളികൾ ഉൾപ്പെടെയുള്ള ഇന്ത്യക്കാർക്ക് വളരെ ഉപകാരപ്രദമാണ്.
