ഡബ്ലിന്‍:ആകസ്മികമായ മരണം മൂലം സ്വര്‍ഗ്ഗീയ പിതാവിന്റെ തിരുസന്നിധിയിലേക്ക് യാത്രയായ കില്‍ഡയര്‍ കൗണ്ടിയിലെ കില്‍കോക്ക് മലയാളി കോട്ടയം പാമ്പാടി കൂരോപ്പട പാറയില്‍ പുത്തന്‍ പുരക്കല്‍ വര്‍ഗ്ഗീസ് സക്കറിയയുടെ മകന്‍ മനോജ് സക്കറിയയുടെ(47) മരണാനന്തര പ്രാര്‍ത്ഥനാ ശുശ്രൂഷകളില്‍ പങ്കെടുക്കുവാനും മനോജിന് അന്തിമോപചാരം അര്‍പ്പിക്കുന്നതിനുമായി അയര്‍ലണ്ട് മലയാളികള്‍ ബുധനാഴ്ച കില്‍കോക്കില്‍ ഒത്തുചേര്‍ന്നു. ബുധനാഴ്ച വൈകിട്ട് 5 മുതല്‍ St . Coca’s church , Kilcock, co. Kildare ല്‍ നടത്തപ്പെട്ട പ്രാര്‍ത്ഥനാ ശുശ്രൂഷകള്‍ക്ക് ഹെവന്‍ലി ഫീസ്റ്റ് ചര്‍ച്ച് നേതൃത്വം നല്‍കി.അയര്‍ലണ്ടിലെ വിവിധ ഭാഗങ്ങളില്‍ നിന്നുമായി നിരവധി മലയാളികളും മതനേതാക്കളും വിവിധ സാംസ്‌കാരിക സംഘടനാ പ്രതിനിധികളും അന്തിമോപചാരമര്‍പ്പിക്കുവാന്‍ എത്തിയിരുന്നു.
ഇന്ന് വ്യാഴാഴ്ച ഉച്ചക്ക് 2 മുതല്‍ വൈകിട്ട് 4 വരെ മൈനൂത്ത് ഫ്യുണറല്‍ ഹോമില്‍ അന്തിമോപചാരം അര്‍പ്പിക്കുവാനുള്ള സൗകര്യം ഉണ്ടായിരിക്കുന്നതാണ്.
OLIVER REILLY FUNERAL DIRECTORS LTD.
LEINSTER STREET
MAYNOOTH
CO. KILDARE
navigator eircode: w23v99e
നാട്ടില്‍ നിന്ന് കുടുംബത്തോടൊപ്പം താമസിക്കുവാനായി എത്തി മൂന്നാം ദിനമാണ് മനോജ് മരണമടഞ്ഞത്. മനോജിന്റെ ഭാര്യ ഷിജി കഴിഞ്ഞ 6 മാസമായി കില്‍കോക്ക് പാര്‍ക്ക് ഹൗസ് നേഴ്‌സിംഗ് ഹോമിലെ സ്റ്റാഫ് നഴ്‌സാണ്. മിക്കഹ് എലിസബത്ത് മകളും ഫാബിയോ മകനുമാണ്. നിയമപരമായ നടപടികള്‍ പൂര്‍ത്തിയാക്കി മൃതദേഹം ഈ വാരാന്ത്യത്തോടെ നാട്ടിലേക്ക് കൊണ്ടുപോകുന്നതാണ്. സംസ്‌കാരം പിന്നീട് കോട്ടയം കൂരോപ്പട ഐ.പി.സി കാര്‍മ്മല്‍ ചര്‍ച്ചില്‍ നടത്തപ്പെടും.
