കോവിഡ് കാലത്തിനിനിടെയുള്ള ഭവനപ്രതിസന്ധി, ജീവിതച്ചെലവ് വര്‍ദ്ധന എന്നിവയ്ക്ക് ഐറിഷ് സര്‍ക്കാര്‍ പഴികളേറ്റുവാങ്ങുന്നതിനിടെ നടന്ന അഭിപ്രായവോട്ടെടുപ്പില്‍, രാജ്യത്തെ ഏറ്റവും ജനപ്രീതിയുള്ള രാഷ്ട്രീയ പാര്‍ട്ടി പ്രധാന പ്രതിപക്ഷമായ Sinn Fein-നെന്ന് റിപ്പോര്‍ട്ട്. ഭരണകക്ഷികളായ പാര്‍ട്ടികളെക്കാളും ഏറെ മെച്ചപ്പെട്ട ജനപിന്തുണയാണ് മേരി ലൂ മക്‌ഡൊണാള്‍ഡ് നയിക്കുന്ന പാര്‍ട്ടിക്ക് നിലവില്‍ ലഭിക്കുന്നതെന്നും Sunday Times/ Behaviour and Attitude Poll വ്യക്തമാക്കുന്നു.
പുതിയ സര്‍വേ പ്രകാരം Sinn Fein-നെ 34% ജനങ്ങളാണ് പിന്തുണയ്ക്കുന്നത്. ജനുവരി 23 മുതല്‍ ഈ പിന്തുണ മാറ്റമില്ലാതെ തുടരുകയാണ്.
പ്രധാനമന്ത്രി മീഹോള്‍ മാര്‍ട്ടിന്റെ ഭരണകക്ഷി പാര്‍ട്ടിയായ Fianna Fail-ന് 25% പേരുടെ പിന്തുണയുണ്ട്. മുന്‍ സര്‍വേയില്‍ ഇത് 24% ആയിരുന്നു. പക്ഷേ ലിയോ വരദ്കര്‍ നയിക്കുന്ന മറ്റൊരു ഭരണകക്ഷി പാര്‍ട്ടിയായ Fine Gael-ന്റെ പിന്തുണ 2% കുറഞ്ഞ് 20 ശതമാനത്തിലേയ്ക്ക് എത്തി.
ഗ്രീന്‍ പാര്‍ട്ടി മുന്‍ സര്‍വേയില്‍ നിന്നും രണ്ട് പോയിന്റ് കൂടി വര്‍ദ്ധിപ്പിച്ച് 5% പേരുടെ പിന്തുണയിലേയ്ക്ക് എത്തിയിട്ടുണ്ട്. സോഷ്യല്‍ ഡെമോക്രാറ്റ്‌സിന് നിലവില്‍ 2% പേരുടെ പിന്തുണയുണ്ട്. നേരത്തെ ഇത് 1% ആയിരുന്നു. Solidarity People Before Profit-ന്റെ പിന്തുണ രണ്ടില്‍ നിന്നും 1% ആയി കുറയുകയും ചെയ്തു.
സ്വതന്ത്രര്‍ ഒരു പോയിന്റ് വര്‍ദ്ധിപ്പിച്ച് ജനപ്രീതി 9% ആയി ഉയര്‍ത്തി.
നേതാക്കളില്‍ 51% ജനപിന്തുണയുമായി മീഹോള്‍ മാര്‍ട്ടിനും, മേരി ലൂ മക്‌ഡൊണാള്‍ഡും ഒപ്പത്തിനൊപ്പമാണ്. ഇരുവരും യഥാക്രമം മൂന്ന്, രണ്ട് പോയിന്റുകള്‍ വര്‍ദ്ധിപ്പിച്ചു. ഉപപ്രധാനമന്ത്രി ലിയോ വരദ്കറിന്റെ ജനപ്രീതി മൂന്ന് പോയിന്റ് വര്‍ദ്ധിച്ച് 44% ആയി. ഗ്രീന്‍ പാര്‍ട്ടി നേതാവ് ഈമണ്‍ റയാന് 33% പേരുടെ പിന്തുണയുണ്ട്.
സര്‍ക്കാരിന്റെ ആകെ ജനപ്രീതി 46% ആണ്. മുന്‍ സര്‍വേയെക്കാള്‍ 2% അധികമാണ് ഇതെന്നതിനാല്‍ നിലവിലെ വിലക്കയറ്റവും മറ്റും സര്‍ക്കാരിനെ കാര്യമായി ബാധിച്ചില്ലെന്ന് വേണം അനുമാനിക്കാന്‍.
വോട്ടിങ് അവകാശമുള്ള 928 പേരാണ് സര്‍വേയില്‍ പങ്കെടുത്തത്. ജനുവരി 27 മുതല്‍ ഫെബ്രുവരി 8 വരെയാണ് മുഖാമുഖമുള്ള സര്‍വേ നടന്നത്.
