അയര്‍ലണ്ടിലെ ഏറ്റവും ജനകീയ രാഷ്ട്രീയ പാര്‍ട്ടിയായി Sinn Fein തുടരുന്നു. പ്രധാനമന്ത്രി മീഹോള്‍ മാര്‍ട്ടിനാണ് രാജ്യത്തെ ഏറ്റവും ജനപ്രീതിയുള്ള രാഷ്ട്രീയ നേതാവെന്നും The Sunday Independent നടത്തിയ ഏറ്റവും പുതിയ സര്‍വേയില്‍ വ്യക്തമായി.
ജനങ്ങളില്‍ 33% പേരാണ് Sinn Fein-നെ പിന്തുണയ്ക്കുന്നത്. ഭരണകക്ഷിയായ Fine Gael-ന് 22% പേരുടെ പിന്തുണയാണുള്ളത്. മറ്റൊരു ഭരണകക്ഷിയായ Fianna Fail-ന്റെ പിന്തുണ രണ്ട് ശതമാനം കുറഞ്ഞ് 18% ആയി.
ഗ്രീന്‍ പാര്‍ട്ടിക്കുള്ള പിന്തുണയും ഒരു ശതമാനം കുറഞ്ഞ് 3 ശതമാനത്തിലേയ്‌ക്കെത്തി. അതേസമയം ലേബര്‍ പാര്‍ട്ടിക്കുള്ള പിന്തുണ ഒരു ശതമാനം വര്‍ദ്ധിച്ച് 4% ആയി.
സോഷ്യല്‍ ഡെമോക്രാറ്റ്‌സിനുള്ള പിന്തുണ 6% ആയി തുടരുകയാണ്. പക്ഷേ Solidarity-People Before Profit-ന്റെ പിന്തുണ രണ്ട് പോയിന്റ് കുറഞ്ഞ് 2% ആയി.
മറ്റൊരു പാര്‍ട്ടിയായ Aontu-വിന്റെ പിന്തുണ ഒരു ശതമാനം വര്‍ദ്ധിച്ച് 3% ആയി.
സ്വതന്ത്രര്‍ക്കെല്ലാം കൂടി 10% ജനങ്ങളുടെ പിന്തുണയുണ്ട്.
ജനപ്രീതിയില്‍ പ്രധാനമന്ത്രി മീഹോള്‍ മാര്‍ട്ടിനാണ് മുന്നില്‍. 10-ല്‍ 4.3 പോയിന്റാണ് അദ്ദേഹം നേടിയിരിക്കുന്നത്. തൊട്ടുപിന്നാലെ 4.1 പോയിന്റുമായി പ്രതിപക്ഷ നേതാവായ മേരി ലൂ മക്‌ഡൊണാള്‍ഡാണ്. ഉപപ്രധാനമന്ത്രിയും Fine Gael നേതാവുമായ ലിയോ വരദ്കര്‍ക്ക് 3.8 പോയിന്റാണ് ലഭിച്ചത്.
1,135 പേരെ സര്‍വേ നടത്തിയതിലൂടെയാണ് The Sunday Independent റിപ്പോര്‍ട്ട് തയ്യാറാക്കിയത്.
