ടിപ്പററിയിലെ M7-ല്‍ പുതിയ നിരീക്ഷണ ക്യാമറകള്‍ സ്ഥാപിക്കുന്നതോടെ അടുത്തയാഴ്ച മുതല്‍ അമിതവേഗത്തില്‍ പോകുന്ന വാഹനങ്ങള്‍ക്ക് പിഴയിടുന്നത് കര്‍ശനമാകും. M7-ലെ Junction 26 (Nenagh West)-നും Junction 27 (Birdhill)-നും ഇടയില്‍ സ്ഥാപിക്കുന്ന Motorway Average Speed Safety Camera system ആണ് ഈ പ്രദേശത്ത് കൂടെ അമിതവേഗത്തില്‍ പോകുന്നവരെ പിടികൂടുക. 24 മണിക്കൂറും നിരീക്ഷണം നടത്തുന്ന തരത്തിലാണ് സിസ്റ്റം.
ഏപ്രില്‍ 25 രാവിലെ 7 മണിമുതല്‍ സംവിധാനം പൂര്‍ണ്ണമായും പ്രവര്‍ത്തനക്ഷമമാകും. മാര്‍ച്ച് മുതല്‍ ക്യാമറ പരീക്ഷണാര്‍ത്ഥം പ്രവര്‍ത്തനം നടത്തുന്നുണ്ടെങ്കിലും തിങ്കളാഴ്ച മുതല്‍ മാത്രമേ പിഴ ഈടാക്കിത്തുടങ്ങുകയുള്ളൂ.
ഈ റോഡില്‍ പരമാവധി വേഗം മണിക്കൂറില്‍ 120 കി.മീ ആണ്. അതിന് മുകളില്‍ പോയാല്‍ ക്യാമറ ഓട്ടോമാറ്റിക്കായി ക്ലിക്ക് ചെയ്യും.
ഡബ്ലിന്‍ ടണലില്‍ 2017 മുതല്‍ ഈ ക്യാമറ സിസ്റ്റം നിലവിലുണ്ടെങ്കിലും, മെയിന്‍ മോട്ടോര്‍വേയില്‍ ആദ്യമായാണ് ഇത് സ്ഥാപിക്കുന്നത്.
നിലവില്‍ 80 യൂറോ പിഴയും, മൂന്ന് പെനാല്‍റ്റി പോയിന്റുകളുമാണ് അമിതവേഗതയ്ക്കുള്ള ശിക്ഷയെന്ന് ഗാര്‍ഡ വ്യക്തമാക്കി. അതേസമയം പിഴ ഈടാക്കാനല്ലെന്നും, ഡ്രൈവര്‍മാരെ നിയമം അനുസരിപ്പിക്കാനാണ് ക്യാമറ സ്ഥാപിക്കുന്നതെന്നും ഗാര്‍ഡ വ്യക്തമാക്കി.
