അയര്‍ലന്‍ഡില്‍ നാല് വയസ്സുകാരിയുടെ മരണം Strep – A ബാക്ടീരിയ മൂലമെന്ന് സംശയം. ഇത് സംബന്ധിച്ച് വ്യക്തത വരുത്തുന്നതിനായി കൂടുതല്‍ പരിശോധനകള്‍ നടത്തിവരികയാണെന്ന് National Health Protection ഡയറക്ടര്‍ Eamonn O’Moore പറഞ്ഞു. വടക്കന്‍ അയര്‍ലന്‍ഡില്‍ കഴിഞ്ഞ ദിവസം മരണപ്പെട്ട അഞ്ചുവയസ്സുകാരിക്ക് Strep – A ബാധിച്ചിരുന്നതായി സ്ഥിരകരിച്ചിരുന്നു. ഈ സാഹചര്യത്തിലാണ് അയര്‍ലന്‍ഡിലെ കുട്ടിയിലും ബാക്ടീരിയ ബാധ ഉണ്ടായേക്കാമെന്ന സംശയമുണര്‍ന്നത്. കൂടുതല്‍ ലബോറട്ടറി പരിശോധനകള്‍ക്ക് ശേഷം മാത്രമേ മരണകാരണം സ്ഥിരീകരിക്കുവാന്‍ കഴിയൂ എന്ന് Eamonn O’Moore പറഞ്ഞു.
ഈ വര്‍ഷം ഇന്നുവരെയുള്ള കണക്കുകളനുസരിച്ച് അയര്‍ലന്‍ഡില്‍ ആകെ 55 പേരില്‍ മാത്രമേ ഗുരുതരസ്വഭാവമുള്ള Group A Streptococcal disease (iGAS) ബാധ ഉണ്ടായിട്ടുള്ളൂ. രണ്ട് മരണങ്ങള്‍ ഇതുമൂലമാണെന്ന് സ്ഥിരീകരിച്ചിരുന്നെങ്കിലും ഇവ രണ്ടും മുതിര്‍ന്നവരായിരുന്നുവെന്ന് Eamonn O’Moore പറഞ്ഞു. രോഗബാധ സ്ഥിരീകരിച്ചിരുന്നവരില്‍ 14 പേര്‍ പത്ത് വയസ്സിന് താഴെ പ്രായമുള്ള കുട്ടികളായിരുന്നു.
എന്താണ് Strep – A
ചര്‍മ്മത്തിലും, തൊണ്ടയിലും കണ്ടുവരുന്ന ഒരുതരം ബാക്ടീരിയയാണ് Strep – A. ബാക്ടീരിയ ബാധിക്കുന്നവരില്‍ സാധാരണയായി പനി, തൊണ്ടവേദന, സ്കിന്‍ ഇന്‍ഫെക്ഷന്‍ തുടങ്ങിയ ലക്ഷണങ്ങള്‍ പ്രകിപ്പിച്ചേക്കാം. എന്നാല്‍ ചില സമയങ്ങളില്‍ ബാക്ടീരിയ ബാധമൂലം Group A Streptococcal (iGAS) എന്ന ഗുരുതരരോഗാവസ്ഥയിലേക്കും എത്താം.
കുട്ടികളില്‍ ഭക്ഷണം കഴിക്കുമ്പോള്‍ തൊണ്ടയിലെ വേദന, പനി, ടോണ്‍സിലുകളില്‍ തടിപ്പും, വെളുത്ത പാടുകളും, കഴുത്തിലെ ഗ്രന്ഥികളില്‍ വീക്കം, ത്വക്ക് അലര്‍ജി തുടങ്ങിയ ലക്ഷണങ്ങള്‍ ഉണ്ടാവുമ്പോള്‍ കൂടുതല്‍ ശ്രദ്ധ പുലര്‍ത്തണമെന്നാണ് ആരോഗ്യവിദഗ്ധര്‍ നല്‍കുന്ന മുന്നറിയിപ്പ്.
