ഡബ്ലിനിലെ റോയൽ കോളേജ് ഓഫ് സർജെൻസ് അയർലണ്ടിന്റെ ലോക പ്രശസ്തമായ ഫെല്ലോഷിപ്പ് കരസ്ഥമാക്കി അയർലൻഡ് മലയാളി ഷിന്ടോ ബെനഡിക്ട് .
നഴ്സിംഗ്, മെഡിസിൻ അടക്കം പ്രൊഫഷണൽ ആരോഗ്യമേഖലകളിൽ പ്രശസ്തസേവനം കാഴ്ചവെക്കുന്ന വ്യക്തികളാണ് ഈ ഫെലോഷിപ്പിന് അർഹരാകുന്നത്. ലോകാരോഗ്യ സംഘടനാ ഡയറക്ടർ ജനറൽ റ്റെഡ്‌റോസ് ജിബ്രീയേസുസ് , ചീഫ് നഴ്സിംഗ് ഓഫീസർ എലിസബത്ത് ഇറോ തുടങ്ങിയവർ മുൻകാല ഫെല്ലോകൾ ആണ്.
കഴിഞ്ഞ പതിമൂന്നു വർഷമായി അയർലണ്ടിലെ വിവിധ നഴ്സിംഗ് ഹോമുകളിൽ നഴ്സിങ്ങിലും അഡ്മിനിസ്ട്രേഷനിലും സേവനമനുഷ്ഠിച്ചു വരുന്ന ഷിന്ടോ ജിറോന്റോളോജിക്കൽ നഴ്സിംഗ് രംഗത്ത് നൽകിയ സംഭാവനകളാണ് അദ്ദേഹത്തെ ഈ വർഷം RCSI ഫെലോഷിപ്പിന് അർഹനാക്കിയത്.
ഈയൊരു അംഗീകാരം ലഭിച്ചതിൽ വളരെയധികം സന്തോഷം ഉണ്ടെന്നു ഷിന്ടോ പറഞ്ഞു. “സാധാരണഗതിയിൽ നഴ്സിംഗ് ഹോം മേഖലയിൽ തുടരാൻ അധികം പേരും താല്പര്യപ്പെടാറില്ല. നഴ്സിങ്ങിൽ പൊതുവെ അവഗണിക്കപ്പെടുന്ന ഒരു മേഖലയാണ് ജിറോന്റോളോജിക്കൽ നഴ്സിംഗ്. എന്നാൽ ലോകമെമ്പാടും, പ്രത്യേകിച്ച് അയർലൻഡ് പോലെ അനേകം വികസിത രാജ്യങ്ങളിൽ അടുത്ത പതിറ്റാണ്ടിൽ തന്നെ പ്രായാധിക ജനസംഖ്യ ക്രമാതീതമായി ഉയരുകയും തന്മൂലം ഒഴിച്ചുകൂടാനാവാത്തതുമായി തീരാൻ പോകുന്ന മേഖലയാണ് ഇത്. ഈ അംഗീകാരം അതുകൊണ്ടു തന്നെ അഭിമാനകരമെന്നതിലുപരി ഈ മേഖലയിൽ തുടരുവാനും തുടർ പഠനങ്ങൾ നടത്തുവാനും ചിലർക്കെങ്കിലും പ്രചോദനമായേക്കുമെന്ന പ്രത്യാശയും മുന്നോട്ടു വെയ്ക്കുന്നു” എന്ന് ഷിന്ടോ പറയുന്നു. “തീർച്ചയായും ഈ ഫെല്ലോഷിപ് തുറന്നു തരുന്ന career , networking and academic വാതിലുകൾ ആകർഷകമാണെന്നതിൽ സംശയമില്ല “
ട്രിനിറ്റി കോളേജിൽ നിന്നും 2015 ൽ നഴ്സിംഗ് ബിരുദാനന്തര ബിരുദം കരസ്ഥമാക്കിയ ഷിന്ടോ ഇപ്പോൾ Drumcondra-യിലെ ബീച്ച് ലോൺ നഴ്സിംഗ് ഹോമിൽ ഡയറക്ടർ ഓഫ് നഴ്സിംഗ് ആണ്. ഭാര്യ സിജി ജോസ് മാറ്റർ യൂണിവേഴ്സിറ്റി ഹോസ്പിറ്റലിൽ സ്റ്റാഫ് നേഴ്സ് ആണ്
