കെറി യൂണിവേഴ്സിറ്റി ഹോസ്പിറ്റലിന് പുറത്തുവച്ച് വൃദ്ധനെ ആശുപത്രി ജീവനക്കാരന് ക്രൂരമായി മര്ദ്ദിച്ചതായി പരാതി. മര്ദ്ദനമേറ്റ ഇദ്ദേഹത്തെ ആദ്യം ഇതേ ആശുപത്രിയിലും, പിന്നീട് കോര്ക്ക് യൂണിവേഴ്സിറ്റി ഹോസ്പിറ്റലിലും പ്രവേശിപ്പിച്ചതായാണ് ഗാര്ഡ പറയുന്നത്. ചികിത്സയില് കഴിയുന്ന ഇദ്ദേഹത്തിന്റെ സ്ഥിതി ഗുരുതരമായി തുടരുകയാണ്.
Tralee-യിലെ കെറി യൂണിവേഴ്സിറ്റി ഹോസ്പിറ്റല് കവാടത്തിന് പുറത്ത് നവംബര് 7-നായിരുന്നു സംഭവം. വൈകിട്ട് 7 മണിയോടെ നടന്ന അക്രമത്തില് ആശുപത്രി ജീവനക്കാരന് വൃദ്ധനെ പരിക്കേല്പ്പിക്കുകയായിരുന്നുവെന്നാണ് റിപ്പോര്ട്ട്. ഇദ്ദേഹത്തിന് തലയ്ക്ക് ഗുരുതരമായി പരിക്കേറ്റതായും ഗാര്ഡ പറയുന്നു.
സംഭവത്തിന്റെ ദൃക്സാക്ഷികളാരെങ്കിലുമുണ്ടെങ്കില് തങ്ങളെ ബന്ധപ്പെടണമെന്നും ഗാര്ഡ അറിയിച്ചു. നവംബര് 7 ഞായറാഴ്ച വൈകിട്ട് 5 മണിക്കും, 8 മണിക്കും ഇടയില് University Hospital Kerry A&E-യിലെ പ്രവേശനകവാടത്തിന് സമീപം ഉണ്ടായിരുന്നവര് Tralee Garda Station 066 7102300, Garda Confidential Line 1800 666 111 എന്നീ നമ്പറുകളിലോ, അല്ലെങ്കില് അടുത്തുള്ള ഏതെങ്കിലും ഗാര്ഡ സ്റ്റേഷനിലെ വിവരമറിയിക്കണം.