ഹംഗറിയില്‍ ഉപേക്ഷിക്കപ്പെട്ട ട്രക്കില്‍ അമ്പത് മൃതദേഹങ്ങള്‍
വിയന്ന: യൂറോപ്പിനെ ഞെട്ടിച്ച് മറ്റൊരു കുടിയേറ്റ ദുരന്തം കൂടി. വ്യാഴാഴ്ച ഓസ്ട്രിയ ഹംഗറി ഹൈവേയില്‍ ഉപേക്ഷിക്കപ്പെട്ട ട്രക്കില്‍നിന്ന് 50ഓളം അഴുകിയ ശവശരീരങ്ങള്‍ കണ്ടെത്തി. പോലീസ് പട്രോളിങിനിടെ ഹൈവേയില്‍ നിര്‍ത്തിയിട്ടിരുന്ന ട്രക്ക് ശ്രദ്ധയില്‍പ്പെട്ടു പരിശോധിച്ചപ്പോഴാണ് മൃതദേഹങ്ങള്‍ കണ്ടെത്തിയത്. ട്രക്കിന്റെ പിന്‍ഭാഗത്തുള്ള ഡോര്‍ തുറന്ന നിലയിലായിരുന്നുവെന്നു ബെര്‍ഗന്‍ലാന്‍ഡ് പോലീസ് ചീഫ് ഹാന്‍സ് പീറ്റര്‍ പറഞ്ഞു. രക്തത്തുള്ളികള്‍ ഇറ്റുവീഴുന്നുണ്ടായിരുന്നുവെന്നും അദ്ദേഹം പറഞ്ഞു. മൃതദേഹങ്ങള്‍ തിരിച്ചറിഞ്ഞിട്ടില്ല. മനുഷ്യക്കടത്താകാം അപകടത്തിനു പിന്നിലെന്നാണു പൊലീസ് നിഗമനം. ഓസ്ട്രിയന്‍ ആഭ്യന്തര മന്ത്രി ജോഹാന ലെയിറ്റ്‌നര്‍ സംഭവത്തെ അപലപിച്ചു.
